Психиатрия — тоифа ТЕСТ ва ОҒЗАКИ жавоблари

Невротик ва неврозга ўхшаш касалликларнинг дифференциал ташхисси. Невроз (ХКК-10 Ф40–Ф48) – психоген, функционал, қайтар бузилиш: беморда танқид сақланган, симптом "бегона" ва ёқимсиз деб кечирилади (эго-дистоник), психотик белгилар йўқ. Ясперс триадаси: психотравма касалликни бошлайди → клиник мазмунда травма акс этади → травма ҳал бўлса ҳолат яхшиланади.

Неврозсимон (неврозга ўхшаш) ҳолат – ташқи кўриниши невроздек (астения, хавотир, фобия, обсессия, ипохондрия), лекин асосида бошқа касаллик ётади:

– органик: бош мия жароҳати оқибати (Ф07.2), қон томир касалликлари, нейроинфекция, интоксикация – Ф06.4, Ф06.6;

– соматик: тиреотоксикоз, гипотиреоз, анемия, гипогликемия, феохромоцитома, аритмиялар;

– эндоген: суст кечувчи шизофрения (ХКК-10 да Ф21 шизотипик бузилиш), сиклотимия, депрессия дебюти;

– эпилепсия, ПАВ истеъмоли ва бекор қилиниши.

Фарқловчи белгилар:

– психотравма билан боғлиқлик йўқ ёки у симптомни тушунтирмайди;

– симптомлар монотон, стереотип, эмоционал бўёғи суст, баъзан ғалати;

– органик фон: бош оғриғи, метеосезгирлик, иссиқ ва алкоголни кўтара олмаслик, хотира пасайиши, неврологик микросимптоматика;

– эндоген фон: сабабсиз бошланиш, фазалилик, эмоционал сўниш, фикрлашда резонёрлик ва "сирпаниш", тобора кучаювчи салбий симптомлар;

– психотерапияга жавоб кучсиз, кечиш прогредиэнт.

Текширув: неврологик кўрик, ЭЭГ, МРТ, қалқонсимон без гормонлари, глюкоза, қон таҳлили, Б12; патопсихологик усуллар (Лурия бўйича 10 сўз, пиктограмма, синфлаштириш, истисно қилиш) – органик тип (чарчаш, секинлашув) ёки шизофрения типидаги (латент белгиларга таяниш) ўзгаришларни очади.

Амалий хулоса: "невроз" ташхиси истисно ташхисидир – аввал органик, соматик ва эндоген сабаб инкор қилинади, шундан кейин психоген табиат исботланади.